ئەو چالاکییە خۆبەخشیانەی بەژداریم تێداکردوون

بەژدارییەکانم لە هەندێ چالاکی خۆبەخشانە؛

حەزم بە هەموو جۆرە کارێکی خۆبەخشی و لێبوردەییانە هەیە، بەوەی کارەکە بۆ ناو و خۆدەرخشتن نەبێ وەکو ئەوەی زۆرجار دەبینرێ لە ژێر ناوی خۆبەخشییەوە کۆمەڵێک کەس دەیکەن، و خۆیانی پێ دەژێنن..

هەندێ بیرۆکەی خۆبەخشانە بەردەوام لە خەیاڵم دابووە، حەزم کردوە ئەنجامی بدەم، بەڵام نەگونجاوە تا ئێستا یاخود هەوڵی ئەنجامدانیانم نەداوە!

وەکو؛

هەڵمەتی بۆیەکردنی شۆستەی یەکێک لە شەقامەکانی شار.

بۆیەکردنی ژوورێکی خوێندنگەیەکی سەرەتایی.

ووتنەوەی وانەیەک هەفتانە لە ڕۆژی پشووی کۆتایی هەفتە دا.

خۆبەخشی ئەوەیە تۆ سودێکت هەبێ یارمەتی کەسێک بدەی، هاندان و پاڵپشتی بێت...

لە خوارەوە لیستی بەژدارییەکانمە بە پێی کات و گونجاوی بۆم؛

 بڵاوکردنەوە  دەرفەتی کار و دۆزینەوەی کار
لە ناوەڕاستی ساڵی ٢٠١٠ ـەوە کاتێک ئەدمینی گروپی کۆلێژەکەمان بووم - گروپی فێرخوازانی کۆلێژ، هەوڵمدا زۆرترین ئەو دەرفەتی کارانەی بەرچاوم دەکەوتن بڵاوبکەمەوە بۆ ئەوەی ئەندامانی گروپەکە کە نزیکەی هەزار کەس بوون و لە کۆلێژەکەمان بوون سودی لێ ببینن.

پاشانیش لە چەند پەیجێکی تری فەیسبووک وەکو: کوردستان گاید، پەیژە، ڕێدۆزی کوردستان و دواتریش لە گروپی دۆزینەوەی  کار لە کوردستان، ڕۆژانە و بەپێی توانا کارم بڵاودەکردەوە.

لە ئێستاش دا و بەردەوام، لەگەڵ کۆمەڵێک هاوڕێی تر لە گروپەکانی ئێف_جەی_کەی لە فەیسبووک و تۆڕەکانی تر بەپێی توانا دەرفەتی کار بڵاو دەکەمەوە، وە لە ڕێگەی نامەوە ئەوەندەی کە بەردەوام نامەم بۆدێ یارمەتی دەدەم بە هەر جۆرێک بێ
و ناردنی هەڵیکاری دیاری کراو بۆ ئەو کەسانەی داوای دەکەن.

هەوڵەدەم، ئەو هەڵە باوانەی هەیە نەمێنن لە چۆنیەتی دۆزینەوەی کار، چۆنیەتی ناردنی داخوازینامەی کار
چۆنیەتی ڕێکخستنی سیڤی و ...هتد. بۆیە دەکرێ بڵێم کاتێکی زۆرم بۆ داناوە و بەردەوام ڕۆژانە بەشێکی کاتەکانی بردووم.


چەند چالاکییەکی خۆبەخشانەی ئێن وای ئێن
وەکو ئەندام لە تۆڕی خۆبەخشانی گەنجانی نیشتیمان لە هەولێر، لە کۆمەڵێک چالاکی ئەم تۆڕە خۆبەخشی و گەنجانەیە بەژداربووم لە دوو سێ چالاکیی بچوکیان، ئەو چالاکیانەی گشتگیر بووە و دەکرێ بڵێم زیاتر ڕەمزی بوونە - ئەفسوس!

ئاسمان موڵکی ئەستێرەکانە -

  گردبونەوەی ناڕەزایی دژی داخستنی فرۆکەخانەکانی کوردستان٢٠١٧ 

ئاهەنگی ڕەنگەکان -

کۆبونەوەی بەرفراوان بۆ پاڵپشتی و هیواخوازی بۆ سەربەخۆیی و هەڵدانی ڕەنگەکان

لە پێناوی ئازادی و شادی ٢٠١٧ 

نەخشاندنی ئاڵای کوردستان -

کۆبونەوەی نەخشاندنی ئاڵای کوردستان لە ناو یاریگای فەڕەنسۆ هەریری

لە ڕۆژی پشتگیری سەربەخۆیی٢٠١٧

ژینگەیەکی خاوێن، کوردستانێکی خاوێن

ڕۆژێکی خۆش بوو وەکو تاکە کارمەندی بەشی ئایتی کۆمپانیاکەمان، بەژداریم کرد لەم چالاکییە، کە بریتی بوو لە هەڵمەتی .پاککردنەوەی شار و نیشاندانی هۆشیاریی پاک و خاوێنی

لە دەرەوەی چوارچێوەی گروپ و چالاکی گشتی، لە کاتی سەیرانکردن و دەرچوونەکان، بەپێی توانا هەوڵ دەدەین، ئەوەندەی بکرێ ئەو ژینگەیەی دەورەبەر پاک بکەینەوە.

وەرگێڕانی فەیسبووک

لە ساڵی ٢٠١٥ لەگەڵ کۆمەڵێک گەنجی چالاک بەژدار بووم لە دەستەی وەرگێڕانی زمانی کوردی سۆرانی بۆ فەیسبووک
ماوەی ساڵ و نیوێک بەژدار بووم لە وەرگێڕان و لە تۆپ لیستی بەژداربوان دابووم لە کارەکە، لە گروپی دەستەی وەرگێڕان ڕاوبۆچوون و دەمەتەقیێ باشترکردنی کارەکەمان کردوە، کە چ وشەیەکی گونجاو دابنرێ، و هەڵسەنگاندنی وەرگێڕاوەکان.

وەرگێڕانی گۆگڵ

سەرباری ئەوەی بەژداربووی فەیسبووک بووم، بەژداریم کرد لە وەرگێڕانی وەرگێڕی گووگڵ، بۆ زیادبوونی زمانی کوردی،
وە بەژدارییەکی باشم کردوە و بەردەوامم، بە ئومێدی بینینی دەرئەنجامەکەی لە کاتی خۆی دا.

ویکیپیدیا

بەژداری لە دانانی بابەتی نوێ لە ویکیپێدیا و هەوڵی فراوانکاری بەکارهێنانی زمانی کوردی لە ویکیپێدیا 

لەمەدا بەژدارییەکی زۆر کەمم کردوە کە بۆ باسکردن ڕەنگە نەشێ، هۆکاری ئەوەش دەگەڕێتەوە بۆ پوختی و تێر و تەسەلی لە وتارەکانی ویکپیدیا، ڕەنگە نوسینی کۆڵکە وتارێک شتێکی باش بێ بەوەی هەر نەبێ زۆرترین سەرچاوەی کوردی هەبێت ئەگەر یەک دێر نوسینینیش بێت، بەلام چ ئەگەر وتارێکی زۆر باش بێت!

بەخشینی خوێن

ڕەنگە چاوەڕێ نەبوو بم لە ژیانم دا خوێن ببەخشم یان هیچ کات بیرم لێ نەکردبێتەوە، بەڵام سودفەی کرد و دەرفەتێک هاتە پێش، کە خوێن دەبەخشرا بە پێشمەرگەی کوردستان کە لە جەنگی دژ بە ڕێکخراوی داعش دابوون، ئیتر منیش خوێنم بەخشی،
هەستێکی خۆشە وچالاکییەکی جیاوازە!

٢:٣٠ ی دوا نیوەڕۆ

٢٢/١/٢٠١٨

سۆران عبدالرحمن

گێنی پیگم نەکڕی

بۆ ماوەیەک خواستم هەبوو بیکڕم، دوای ئەوەی لەسەرم خوێندەوە و ئەزموونی خەڵکی ترم بینی لەگەڵ بەخێوکردنی ئەم گیاندارە ماڵییە گەیشتمە ئەو بۆچوونەی نەیکڕم و جارێکی تر بیری لێنەکەمەوە :)

بەرازی غینیایی (گینی پیگی ماڵی) هەروەها "کەیڤی" پێ دەوترێ، جۆرێکە لە گیاندارە قرتێنەرەکان "خورۆکەکان" (ڕۆدێنت بە ئینگلیزی) و لە بنەماڵەی گیاندارە شیردەرەکانە، هەرچەندە ناسراوە بە بەرازی غینیایی لە ڕاستی دا سەر بە بنەماڵەی بەرازەکان نیە، و  ڕەچەلەکەکەشی وڵاتی غینیا نیە، 

لە بنەڕەت دا ڕەچەڵەکیان دەگەڕێتەوە بۆ چیاکانی ئەندێز، کەیڤی - گێنی پیگ ڕۆڵێکی بەرچاوی هەیە لە شارستانیەتی میللی لە ئەمریکای باشور وەکو سەرچاوەی خۆراک و هەروەها لە چارەسەری نەریتی و بۆنە و ئاهەنگە ئاینییەکانیان دا

ئەم گیاندارە هەوادارێکی زۆری هەیە بەوەی یەکێکە لە گیاندارە ماڵییەکان و ئەو سروشتەی کە هەیەتی ، ئاگاداربوونی و مامەڵەکردن لەگەڵی ئاسانە، 

ئەم گیاندارە، جۆرێکی گەورەی قرتێنەرەکانە، کێشی لە نێوان ٧٠٠ تاکو ١٢٠٠ گرام دایە، و درێژییەکەی نزیکەی ٢٠- ٢٥ سم دەبێ، بە زۆری نزیکەی ٤ تاوەکو ٥ ساڵ دەژین، هەندێ جار تاوەکو ٨ ساڵ دەژین.

بەپێی تۆماری کتیبی گینس بۆ شکاندنی تۆمارە پێوانەییەکان، درێژترین تەمەنی کەیڤی ١٤ ساڵ و ١٠ مانگ بووە.

کەیڤییەکان، هیچ کات چاڵ و کون دروست ناکەن و هێلانەی خۆیان بنیاتنانێن، لە زۆربەی بارەکان دا ، دەگەڕێن بەدوای هێلانە و کونی گیاندارانی تر دا، یاخود ئەو کەلێنانەی بەهۆی گیا و ڕووەکەکانەوە دروست دەبن، لە دەمەو بەیان دا زۆر چالاکن، بەوەی گیاندارە دڕندەکان ڕاویان نەکەن ئەو کاتە هەڵدەبژێرن بۆ دەرچوون و گەڕان و دۆزینەوەی خۆراک.

خۆراکی سەرەکیان ڕووەکەکانە، و هیچ جۆرە خۆراکێک کۆناکەنە و پاشەکەوت ناکەن، وەکو ئەوەی هەندێ لە گیاندارانی تر دەیکەن، جۆری خۆراکیان سروشتییە.

ئەم گیاندارە توانای زۆربوونی هەیە بە درێژایی ساڵ، کاتی منداڵ بوونی بە زۆری لە وەرزی بەهار دایە، ساڵانە تاوەکو ٥ (پێنج) بێچووی دەبێ،  ماوەی سکپڕییەکەی ٥٩-٧٢ ڕۆژە، بەشیوەیەکی گشتی نزیکەی ٦٥ ڕۆژە.

کاتژمێر ١١:٢٦ی شەو

١٧/١/٢٠١٨

سۆران عبدالرحمن